(409)                '          SOUS LE RÈGNE DE CHARLES VI.                              169
Item, à tous ceuls qui ces lettres verront, Guillaume, seigneur de Tignonville, chevalier, conseiller, chambellan du roy nostre sire et garde de la prevosté de Paris, salut. Savoir faisons que par devant Es­tienne Tesson et Thomas du Han, notaires du roy nostre dit seigneur de par lui establiz en son Chastellet de Paris, fu present reverend pere en Dieu, monseigneur Jehan Canard, parla permission divine evesque d'Arraz, conseillier du roy nostre dit seigneur, lequel ayant en soy bon sens, memoire et entendement, de son propre mouvement et de sa cer­taine science, si comme il disoit, en adjoustant à son testament par lui fait et passé soubz le seel de la dicte prevosté de Paris le jeudi vint six jours de fevrier qui fu l'an imc et im, parmi lequel ces presentes sont annexées par maniere de codicille ou de ordonnance de derreniere vo-lenté, donna et laissa, donne et laisse par ces presentes à Jehan Jolis, Alexandre Chappe, Guillemin de Fontenay, Colin Sergent, Berthiot Alard et Huguenin Lambert, son barbier, tous ses serviteurs, ia somme de six cens livres Tournois, tant pour et en recompensacion des grans peinnes et travaulx qu'ilz ont desja pour lui euz et soustenuz de jours et de nuis durans sa maladie, comme afin qu'ilz soient tenuz et plus astrains de le servir bien continuelment et diligenment de cy en avant, à icelle somme de six cens livres Tournois departir egalment entre eulx six ses serviteurs, c'est assavoir, à chascun cent livres Tournois. Toutes­fois il volt et ordonna expressement en ce estre comprins et entenduz les laiz particuliers et generaulx par lui faiz en son dit testament à ses diz serviteurs ou à aucuns d'eulx, sans ce qu'ilz puissent riens de­mander ne avoir d'iceulx lais particuliers et generaulx, fors seule­ment cent livres Tournois chascun d'eulx à eulx donnée et laissée cy dessus.
Et par ce present codicille le dit monseigneur l'evesque ne volt au­cune autre chose estre faicte ou innovée en son dit testament ne en un autre codicille par lui fait soubz le dit seel, l'an mil quatre cens et cinq, le jeudi sept jours du mois de janvier, mais seront et demour-ront yceulx testament et codicille en tous leurs autres poins et articles en leur force et vertu.
22